OpenAI şirkətinin rəhbəri Sem Altman xəbərdarlıq edib ki, dələduzlar şəxsiyyəti saxtalaşdırmaq üçün kütləvi şəkildə süni intellektdən istifadə edəcəklər.
Media məlumat verir ki, ABŞ Federal Ehtiyat Sisteminin sədr müavini ilə söhbət zamanı OpenAI şirkətinin rəhbəri Sem Altman yaxın vaxtlarda dələduzların həm insanın səsini, həm də zahiri görünüşünü, o cümlədən real vaxt rejimində təqlid etmək üçün süni intellektdən kütləvi şəkildə istifadə etməyə başlayacaqlarını bildirib.
Altman buna misal olaraq, istifadəçinin videozəng vasitəsilə kod sözünü səsləndirərək autentifikasiya prosedurunu göstərib. Əgər dələduz həmin kodu bilirsə, dipfeyk texnologiyaları vasitəsilə insanın həm səsini, həm də üzünü təqlid etmək onun üçün çətin olmayacaq. Hazırda dələduzlar əsasən səsi saxtalaşdırırlar, lakin zahiri görünüşün uğurla təqlid olunduğu hallar da məlumdur.
Dipfeyk texnologiyalarından istifadə edən dələduzlarla mübarizə “klin klinlə çıxar” prinsipini xatırladır — banklar saxtakarlıqları aşkar etmək üçün süni intellekt sistemlərindən istifadə edirlər. Bu sistemlər generasiya olunmuş videoda vizual artefaktları, səs yazılarında isə insan səsi üçün qeyri-xarakterik tezliklərdəki səsləri və digər şübhəli detalları təhlil edir.
